PIYESA SA SIGABO 2012 (REGIONAL CONTEST)

SINING: TULAY TUNGO SA PAG-UNLAD NG KINAGISNANG KULTURA

NI: Bb. WINNAFLOR G. GASPAR

Kultura..repleksyon ng ating kasaysayan

Pagpapakita ng tradisyon, pamahiin, kaugalian maging edukasyon

Iba-iba man ang pinagmulan

Iisa ang pinatunguhan

Ang pagkakakilanlan ng bansang ating pinaglaban!

Bayanihan, pakikisama

Hiya, delikadeza,

Utang na loob, palabra de honor, bahala na

Pagmamahal sa pamilya, paggalang sa matatanda

Pagdarasal sa ating Poong Maykapal

Mga kaugaliang Pilipinong di dapat mawaglit, di malilimot.

Pasko, Bagong-taon,

Mahalnaaraw, Todos los Santos

Santakrusan, pyesta,pestibal

Mga selebrasyong patuloy na ipinagdiriwang.

Ngunit...

Dahil sapatuloy na pag-inog ng panahon

Kultura’y nalilimot ng bagong henerasyon

Teknolohiya at mga makabagong imbensyon

Ang tumitimo na sa isipan ng kabataan ngayon.

Limot na nga ba, ang ating kultura?

Mga tradisyon ng ibang rehiyon ay naisantabi na!

Pagka’ t niyakap na ng makabagong panahon,

Ang kultura, na siyang nagpatatag sa ating pagka-Pilipino.

Gising Pilipino, Gising, Gising!

Gisingin ang natutulog na damdamin

Gisingin ang diwang natabunan ng dilim

Gising Pilipino, nariyan ang Sining!

Sayaw, musika, arte, pintura

Literatura, arkitektura, midya at iskultura

Lahat ng ito’y makatutulong

Sa pagsulong at pag-unlad ng ating kultura.

Kilos ng katawan, talas ng isipan

At indayog ng ating natutulog na nakaraan

Mga sayaw at ritwal ng mga ninuno

Bahagi ng sining sa ating kultura.

Himig ng nakalipas na panahon

Tinig ng kasaysayan

Mga kantahingbayan ng bawat rehiyon

Musika’y  maikikintal at maiparirinig.

Tinta ng katalinuhan

Pluma ng karunungan

Mga bugtong, salawikain at iba pang akdang pampanitikan

Mga kwento noong unang panahon

Sa pamamagitan ng Literatura, mababasa ang likha ng mga makata

Kulay ng imahinasyon

Pintura ng nagngangalit na kahapon

Mga larawan ng dapit-hapon

Sa tulong ng biswal, mabubuhay ang gunitang nagpatiwakal.

Maskara ng katotohanan

Tanghalan ng nagkukubling kaganapan

Dalit, duplo, sarswela’t karagatan

Sa tulong ng arte, magigising ang diwa’t damdamin.

Sa tulong ng sining, kultura’y mapananatili

Sa tulong ng sining, kultura’y maipamamahagi

Sa tulong ng sining, kultura’y susulong

Sa tulong ng sining, kultura’y uunlad..

Pagkat isa ang sining, sa instrumento ng pag-unlad ng kinagisnang kultura.